Fermerët braktisin blegtorinë: Rritet me mbi 100% numri i koshereve në një dekadë
Në një kohë kur sektori i blegtorisë po përballet me sfida të mëdha, fermerët shqiptarë po zhvendosen gjithnjë e më shumë drejt bletarisë, tërhequr nga kostot më të ulëta dhe fitimet më të larta që sjell ky sektor. Të dhënat zyrtare nga INSTAT tregojnë një rritje të ndjeshme të numrit të koshereve në vend gjatë dhjetë viteve të fundit.
Sipas statistikave, numri i koshereve në Shqipëri është rritur me 105% mes viteve 2014 dhe 2024, ndërsa në të njëjtën periudhë numri i krerëve në blegtori është përgjysmuar. Vetëm në vitin 2024, numri total i koshereve arriti në 587,3 mijë, nga 518,7 mijë që ishin në vitin 2023, duke shënuar një rritje vjetore prej 13.21%.
Vlora kryeson me rritjen më të madhe
Qarku i Vlorës ka shënuar rritjen më të madhe në nivel vendi. Nga 70.540 koshere në vitin 2023, numri u rrit në 103.520 në vitin 2024, një rritje me 46.75%.
Pas Vlorës, rritje të konsiderueshme kanë pasur qarqet:
Durrësi me 20%
Dibra me 17%
Fieri me 15%
Lezha me 13%
Korça me 9%
Në të gjitha qarqet e tjera u shënua rritje, me përjashtim të Gjirokastrës, e cila shënoi një rënie të lehtë prej 0.2%.
Pse po braktiset blegtoria?
Fermerët e shohin bletarinë si më të leverdishme dhe më pak të rrezikshme krahasuar me blegtorinë tradicionale. Gëzimi, një bletërritës nga Tropoja që administron mbi 160 koshere, tregon se ky sektor kërkon më pak investim fillestar, është më pak i lodhshëm dhe mund të menaxhohet nga një familje e vogël, madje edhe nga të moshuarit.
Sipas tij, një koshere mund të prodhojë deri në 15 kg mjaltë në vit, krahas produkteve të tjera si propolis, polen e dyllë, të cilat gjithashtu kanë çmime në rritje në treg. Përkundrazi, blegtoria kërkon investime të mëdha, sipërfaqe kullotash, stalla, forca të përhershme pune dhe përballje me kostot e larta të ushqimit dhe shërbimeve veterinare.
Bletaria, alternativë premtuese për të ardhmen
Ndërsa të rinjtë emigrojnë dhe mungesa e fuqisë punëtore e vështirëson mbajtjen e fermave të mëdha blegtorale, bletaria po shihet gjithnjë e më shumë si një alternativë më fleksibël dhe e qëndrueshme ekonomikisht. Ekspertët e bujqësisë vlerësojnë se trendi i zhvendosjes drejt bletarisë pritet të vijojë, duke ofruar mundësi të reja për fermerët dhe ekonominë rurale në vend.
